Prem Warbartani
yuun lahakta hai tire nau-ḳhez ḳhvabon ka badan
jaise shabnam se dhule taaza gulabon ka badan
mutriba ne is tarah chheḌe kuchh armanon ke taar
kas gaya angḌa.i lete hi rubabon ka badan
koi pahnata nahin be-dagh lafzon ka libas
kab se uryan hai mohabbat ki kitabon ka badan
raat hai ya sang-e-marmar ka muqaddas maqbara
jis ke andar dafn hai do mahtabon ka badan
a.ine le kar kahan tak ham sarabon ke safir
dhuup ke sahraon men DhunDenge ḳhvabon ka badan
jab ghula bad-e-saba men tere pairahan ka lams
aur bhi mahka tar-o-taza gulabon ka badan
‘prem’ aḳhir sub.h-e-nau kholegi kab band-e-qaba
jhankta hai chilmanon se aftabon ka badan
Leave a Reply