taḌpen kab tak tiri furqat men mohabbat vaale
aa idhar bhi kabhi o naz-o-nazakat vaale
shaiḳh-o-va.iz hon na kis tarah karamat vaale
hazrat-e-pir-e-mughan ki hain ye sohbat vaale
kab tak iza.en sahen teri mohabbat vaale
rahm kar rahm kar o zulm ki aadat vaale
shaiḳh rindon ko bura kah ke gunahgar na ban
are kambaḳht yahi log hain jannat vaale
dekh ja aa ke ki ab naza.a ki halat hai miri
itni taklif kar ai meri nazakat vaale
mujh se aasi ko jo mahshar men mila bagh-e-bahisht
rah ga.e dekh ke munh zohd-o-ibadat vaale
teri furqat men taḌapta hai mira dil kaisa
dekh aa kar kabhi o saḳht tabi.at vaale
jhuum kar aane to de abr-e-siyah ai saaqi
abhi aa ja.enge maiḳhane ki sohbat vaale
dil to kya jaan fida kar den tire qadmon par
ashiqon men tire aise bhi hain himmat vaale
chiḳh uThe aate hi masjid men janab-e-va.iz
chaunk uThte hain yuun hi ḳhvab se ghaflat vaale
koi karta hai mai-e-ishq ko jaa.ez koi man.a
dekhen kya hukm lagate hain shari.at vaale
sohbat-e-mai men bhi milta nahin vaa.iz ko maza
aise dekhe hi nahin ḳhushk tabi.at vaale
rah gaya chup hi savalon pe nakirain ke main
sun chuka tha ki farishte hain ye jannat vaale
kal se hai va.ada-e-vasl aaj na kah yaad nahin
is qadar bhuul na o bhuul ki aadat vaale
qabr se uTh ke qayamat men vahin pahunchenge
hauz-e-kausar hi pe dam lenge tire matvale
mayyat-e-ashiq-e-shaida hai uThana lazim
itna nazuk na ban o mere nazakat vaale
munfa.il ho ke hue pursish-e-isyan se bari
sab se achchhe rahe mahshar men nadamat vaale
ham kahen kya ki hamen kuchh nahin aata hai ‘fahim’
naaz karte hain tabi.at pe tabi.at vaale
Leave a Reply