Sarfraz Zahid
hava chalti hai dam Thahra hua hai
faza men kis ka gham Thahra hua hai
tasavvur men ubharte ḳhal-o-ḳhad par
musavvir ka qalam Thahra hua hai
usi ko apni manzil kah raha hai
jahan jis ka qadam Thahra hua hai
sama.at ke jaziron men kahin par
tire lahje ka ram Thahra hua hai
zara Thahro ki chalti hai abhi saans
chale aao ki dam Thahra hua hai
mire ḳhvabon ke ruḳhsaron pe ab tak
kisi bose ka nam Thahra hua hai
ḳhuda bhi hai usi kuche ka baasi
jahan mera sanam Thahra hua hai
Leave a Reply