Aleem Usmani
main naqsh-ha-e-ḳhun-e-vafa chhoḌ ja.unga
ya.ani ki raz-e-rang-e-hina chhoḌ ja.unga
tu aane vaale kal ke liye kyuun hai fikrmand
tere liye main apni dua chhoḌ ja.unga
tere ḳhilaf koi na khole kabhi zaban
teri nigah men vo nasha chhoḌ ja.unga
aa ja.iyega shauq se be bechain jab ho dil
darvaza apne ghar ka khula chhoḌ ja.unga
ruḳhsar-o-lab ki teri na kam hongi raunaqen
main har ghazal men zikr tira chhoḌ ja.unga
a.ine de sakenge na tujh ko kabhi fareb
teri jabin pe tera pata chhoḌ ja.unga
ik ḳhaas chiiz chhoḌunga sab ke liye ‘alim’
pahle se kyuun bata.un ki kya chhoḌ ja.unga
Leave a Reply