Abdur Rahim Nashtar
main teri chaah men jhuta havas men sachcha huun
bura samajh le magar dusron se achchha huun
main apne aap ko jachta huun be-hisab magar
na jaane teri nigahon main kaisa lagta hon
bichha raha huun kai jaal ird-gard tire
tujhe jakadne ki khvahish men kab se baitha hon
tu barf hai to pighal jaega tamazat se
tu aag hai to main jhonka tujhe hava ka huun
bikhar bhi jaae to mujh se na bach sakega kabhi
tujhe samet ke lafzon men bandh sakta hon
main yuun bhi huun mujhe malum hi na tha ‘nashtar’
samajh raha tha bahut nek huun farishta huun
Leave a Reply