Nadeem Sirsivi
giraft-e-karb se azad ai dil ho hi ja.unga
abhi rasta huun main ik roz manzil ho hi ja.unga
utar jaane de vahshat mere sar se habs-e-ḳhalvat ki
main bit-tadrij phir manus-e-mahfil ho hi ja.unga
gire gar mujh pe barq-e-iltifat-e-chashm-e-tar har dam
to main bil-jabr teri samt maa.il ho hi ja.unga
ba-sad tarkib rakkhe hain qadam tartib se main ne
agar tartib ye bigḌi main zaa.il ho hi ja.unga
mata-e-jan to meri zaat ka hissa hai ik din main
tu mil ja.ega to insan-e-kamil ho hi ja.unga
miri mazlumiyat ki raushni har-su bikharne de
sar-e-maqtal main pesh-e-tegh-e-qatil ho hi ja.unga
zara sa Thahar jaa.en be-ḳhudi ki muztarib maujen
ai dasht-e-gham main ik ḳhamosh sahil ho hi ja.unga
payambar dard ka ban ke tu gar duniya men aa.ega
sahifa ban ke ashkon ka main nazil ho hi ja.unga
kaha us ne qarib aa kar ‘nadim’ ash.ar ki surat
rag-e-afkar men teri main shamil ho hi ja.unga
Leave a Reply