patjhad men khizaon men tujhe dhund rahi huun
main zard fazaon men tujhe dhund rahi huun
bharne hain kai rang mujhe apne diye men
kyuun tez havaon men tujhe dhund rahi huun
nikli huun kisi dhun men kisi yaad ko le kar
aur ujdi adaon men tujhe dhund rahi huun
main khak-nashin aaj bhi takti huun falak ko
muddat se khalaon men tujhe dhund rahi huun
jivan mujhe munsif ne ata ki hain sazaen
main aaj sazaon men tujhe dhund rahi huun
tujh se mile bichhde hue lamhon ki qasam hai
gum-gashta sadaon men tujhe dhund rahi huun
‘shahin’ abhi tak ye mire haath hain khali
be-mehr duaon men tujhe dhund rahi huun
Leave a Reply