Ajmal Siraj
ghum-phir kar isi kuche ki taraf aenge
dil se nikle bhi agar ham to kahan jaenge
ham ko ma.alum tha ye vaqt bhi aa jaega
haan magar ye nahin socha tha ki pachhtaenge
ye bhi tai hai ki jo boenge vo kaTenge yahan
aur ye bhi ki jo khoenge vahi paenge
kabhi fursat se milo to tumhen tafsil ke saath
imtiyaz-e-havas-o-ishq bhi samjhaenge
kah chuke ham hamen itna hi faqat kahna tha
aap farmaiye kuchh aap bhi farmaenge
ek din ḳhud ko nazar aenge ham bhi ‘ajmal’
ek din apni hi avaz se Takraenge
Leave a Reply