silsila jab tiri baton ka javan hota hai
tab har ik jam-ba-kaf jaane kahan hota hai
uf re vo aah jo siine se nikal bhi na sake
haa.e vo dard jo ankhon men nihan hota hai
ḳhud-farebi hai thakan hai ki shikasta-pa.i
har qadam par mujhe manzil ka guman hota hai
in ki nazron ka baḌhava hai vagarna ham se
hal-e-dil kab kisi surat men bayan hota hai
mahfil-e-ghair men kya ishq-o-vafa ki baten
yaan to ye zikr bhi zehnon pe giran hota hai
Leave a Reply