Ajib KHwab Tha Hum Bagh Mein khaDe Hue The

Jabbar Wasif

ajiib ḳhvab tha ham baagh men khaḌe hue the

hamare samne phulon ke sar paḌe hue the

barahna titliyan raqsan thiin uryan shaḳhon par

zamin men saare shajar sharm se gaḌe hue the

tamam paat the niile buzurg bargad ke

usi ko Dasne se sanpon ke phan baḌe hue the

za.iif peḌ the buḌhi hava se sharminda

javan parinde kisi baat par aḌe hue the

na koi naghma-e-bulbul na koi naghma-e-gul

ḳhuda-e-sub.h se sab ḳhush-gulu laḌe hue the

vahin pe samne ‘vasif’ tha ek qabristan

jahan yahan vahan sab namvar saḌe hue the

phir ek qabr hui shaq to us men the do dil

aur un dilon men mohabbat ke nag jaḌe hue the