Poet
tanaben kaTne lagin meri ḳhush-bayani ki
ki ab vo rut hi nahin teri mehrbani ki
Dubo diya hai mujhe meri ḳhush-yaqini ne
ye baat ghaur-talab hai miri kahani ki
ḳhizan men hijr ki Duuba visal ka mausam
magar hai zehn men ḳhushbu si raat raani ki
kabhi to aa.ega sahil tiri rifaqat ka
abhi main baiTha huun kashti men bad-gumani ki
shagufta lahje men vo mujh se bolta hi nahin
jahan men dhuum si hai jis ki ḳhush-bayani ki
kali chaTak uThi mahaul ho gaya gul-bez
jo baat aa.i kabhi us ki ḳhush-bayani ki
gulab chehre umidon ke bujh ga.e ‘mehdi’
na baat kijiye mausam ki mehrbani ki
Leave a Reply