chamke hue hain divar-o-dar raunaq hai bazaron men
kaise kaise log aa.e hain kaisi kaisi caron men
main to us ke samne baiTha us ka chehra paḌhta tha
jaane vo kya DhunD raha tha angrezi aḳhbaron men
vo bhi din the jab har chhuTTi tere saath guzarti thi
aaj magar rakkha hi kya hai hafton aur itvaron men
jaane kis farhad ka tesha kis ke jigar ko chiir gaya
ḳhuun ki dharen dekh raha huun patthar ki divaron men
jin logon ke aql-o-hunar ki dhuum machi thi aalam men
un ko bhi dekha hai rusva shahon ke darbaron men
phuul se chehre shaḳh si banhen jab galiyon men milti hain
kaun bhala phir sair ko jaa.e hare-bhare gulzaron men
to meri ma.asum nazar ko bul-havasi ka dosh na de
main to ḳhud ko dekh raha huun tere hasin ruḳhsaron men
aao un ko bahar la kar taaza hava men biThla.en
log chhupe baiThe hain kab se apni zaat ke gharon men
ab ke to ‘betab’ muri men kuchh kuchh aag barasti thi
jalte sahra aa nikle the bhige hue kohsaron men
Leave a Reply