Main Na Kahta Tha Tum Se

Abu Bakr Abbad

main na kahta tha tum se rah men chhod jaogi

ishq ik riyazat hai kaise thair paogi

aag ka ye dariya hai kyuun kar tair paogi

main na kahta tha tum se

ishq ik ibadat hai payambari amanat hai

kharon se ye pur rasta

kab talak chalogi tum

saath chhod jaogi

main na kahta tha tum se

khauf khata rahta huun

makr se dagha se main

aise dost se bhi jo

kashtiyan dubote hain

beach men samundar ke

main na kahta tha tum se

pahle soch lo sau baar

badban ke uthne se

tufan ke beach jaane se

chhod to na jaogi darmiyan samundar ke

aur tum ne har ik baar ye yaqin dilaya tha

saath jiine marne ki laakh qasmen khaai thiin

aur main ki saada dil aa gaya tha baton men

ansuon men aahon men

jhuut ki kathaon men

jaan kar sabhi kuchh ki

pahle panch kashti men chhed kar ke baithi ho

par tumhari surat jo

taebon si lagti thi

de gai fareb akhir

aur phir jo hona tha ho raha ik din

tum ko chhal hi karna tha

kaise baaz rahti tum

sad.ha vaade kar ke bhi

laakh qasmen kha ke bhi

darmiyan samundar ke

mauj men thapedon ke

chhed kar ke kashti men

satven main ja baithi

main na kahta tha tum se

par nahin nahin ab to

ab main tum se kahta huun

ishq ik safina hai

bahr-e-be-karan ho ya

pur-khatar samundar ho

paar khud utarna hai

tum karo ab apni fikr

kashtiyan badalne ki

athvin ya nauvin ki

manjhi dhund laane ki

koi makr karne ki

main ki ek sada-dil

ishq par yaqin avval ishq par yaqin akhir