Khursheed Rizvi
bana rahe koi dam naqsh-e-pa se kaun kahe
abhi na ḳhaak uḌaa.e hava se kaun kahe
pa.e nashat nafas-do-nafas bacha ke rakhe
ye mudda.a dil-e-be-mudda.a se kaun kahe
ga.i to bu hi nahin rang bhi gulon se gaya
palaT ke baagh men aa.e saba se kaun kahe
vo multafit hain magar ab hamen dimagh nahin
kahe hue ko phir ab ibtida se kaun kahe
bahut se rog dua mangne se jaate hain
ye baat ḳhugar-e-rasm-e-dava se kaun kahe
vo dil ka dard vo na-guftani suḳhan ‘ḳhurshid’
ḳhuda se kah liya ḳhalq-e-ḳhuda se kaun kahe
Leave a Reply