dil gaya dil-lagi nahin jaati
rote rote hansi nahin jaati
ankhen saaqi ki jab se dekhi hain
ham se do ghunT pi nahin jaati
kabhi ham bhi taḌap men bijli the
ab to karvaT bhi li nahin jaati
un ko siine se bhi laga dekha
haa.e dil ki lagi nahin jaati
baat karte vo qatl karta hai
baat bhi jis se ki nahin jaati
aap men aa.e bhi to kya aa.e
lazzat-e-be-ḳhudi nahin jaati
hain vahi mujh se kavishen dil ki
dost ki dushmani nahin jaati
ho ga.e phuul zaḳhm-e-dil khil kar
nahin jaati hansi nahin jaati
Leave a Reply