Chali Jo Piya Ki Gali Dhire Dhire

chali jo piya ki gali dhire dhire

miri aankh kyuun nam hui dhire dhire

ubharta gaya mujh men vo lamha lamha

main tahlil hoti gai dhire dhire

na baisakhiyon ka sahara liya hai

main paanv pe chalti rahi dhire dhire

do-pahren makanon men phaili hui hain

men saae si badhti hui dhire dhire

mira zabt badhta chala ja raha hai

main parchhain maan ki bani dhire dhire

tiri yaad bhi jaise aari hai koi

mire dil pe chalti hui dhire dhire

hava-e-zamana mukhalif thi lekin

main parvaz karti rahi dhire dhire

Leave a Comment