akbar-allahabadi

Jalwa-E-Darbar-E-Dehli

sar men shauq ka sauda dekha

dehli ko ham ne bhi ja dekha

jo kuchh dekha achchha dekha

kya batlaen kya kya dekha

jamuna-ji ke paat ko dekha

achchhe suthre ghaat ko dekha

sab se unche laat ko dekha

hazrat ”duke-connaught’ ko dekha

paltan aur risale dekhe

gore dekhe kaale dekhe

sanginen aur bhale dekhe

band bajane vaale dekhe

khemon ka ik jangal dekha

us jangal men mangal dekha

barahma aur varangal dekha

izzat khvahon ka danggal dekha

sadken thiin har kamp se jaari

paani tha har pump se jaari

nuur ki maujen lamp se jaari

tezi thi har jump se jaari

Daali men narangi dekhi

mahfil men sarangi dekhi

bairangi barangi dekhi

dahr ki ranga-rangi dekhi

achchhe-achchhon ko bhatka dekha

bhiid men khate jhatka dekha

munh ko agarche latka dekha

dil darbar se atka dekha

hathi dekhe bhari-bharkam

un ka chalna kam kam tham tham

zarrin jhulen nuur ka aalam

milon tak vo cham-cham cham-cham

pur tha pahlu-e-masjid-e-jame

raushaniyan thiin har-su laame

koi nahin tha kisi ka samea

sab ke sab the diid ke taame

surkhi sadak par kutti dekhi

saans bhi bhiid men ghutti dekhi

atish-bazi chhutti dekhi

lutf ki daulat lutti dekhi

chauki ik chau-lakhkhi dekhi

khuub hi chakkhi-pakhkhi dekhi

har-su neamat rakkhi dekhi

shahd aur duudh ki makkhi dekhi

ek ka hissa mann-o-salva

ek ka hissa thoda halva

ek ka hissa bhiid aur balva

mera hissa duur ka jalva

avaj brish raaja dekha

partav takht-o-taj ka dekha

rang-e-zamana aaj ka dekha

rukh corzon mahraj ka dekha

pahunche phand ke saat samundar

tahat men un ke bison bandar

hikmat-o-danish un ke andar

apni jagah har ek sikandar

auj-e-bakht-e-mulaqi un ka

charkh-e-haft-tabaaqi un ka

mahfil un ki saaqi un ka

ankhen meri baaqi un ka

ham to un ke khair-talab hain

ham kya aise hi sab ke sab hain

un ke raaj ke umda Dhab hain

sab saman-e-aish-o-tarab hain

egzibshan ki shaan anokhi

har shai umda har shai chokhi

aqlidas ki naapi jokhi

man bhar sone ki lagat sokhi

jashn-e-azim is saal hua hai

shahi fort men ball hua hai

raushan har ik hall hua hai

qissa-e-mazi haal hua hai

hai mashhur-e-kucha-e-barzan

ball men nachen lady-corzon

tair-e-hosh the sab ke larzan

rashk se dekh rahi thi har zan

hall men chamkin aa ke yaka-yak

zarrin thi poshak jhka-jhak

mahv tha un ka auj-e-sama tak

charkh pe zohra un ki thi gahak

go raqqasa-e-auj-e-falak thi

us men kahan ye nok-palak thi

indr ki mahfil ki jhalak thi

bazm-e-ishrat subh talak thi

ki hai ye bandish zehn-e-rasa ne

koi maane khvah na maane

sunte hain ham to ye afsane

jis ne dekha ho vo jaane

More Poems

Leave a Comment