Ishaq Virdag
is paar ka ho ke bhi men us paar gaya huun
ik ism ki barakat se ka.i baar gaya huun
ḳhairat men de aaya huun jiiti hui baazi
duniya ye samajhti hai ki main haar gaya huun
thame hue ik raushni ke haath ko har shab
paani pe qadam rakh ke main us paar gaya huun
darvaze ko auqat men laane ke liye main
divar ke andar se ka.i baar gaya huun
kya mere liye ek bhi kirdar nahin tha
kyuun apni kahani se main be-kar gaya huun
mushkil hai tujhe aag ke dariya se bacha luun
ai shahr-e-peshawar main tujhe haar gaya huun
ḳhvabon ne jo ik khel banaya tha mire dost
is khel men ta.abir se main haar gaya huun
Leave a Reply