ruke hue hain jo dariya unhen ravani de
tu apne hone ki mujh ko koi nishani de
palaT ke dekh luun tujh ko to sang ho ja.un
mire yaqin ko aisi koi kahani de
main shah-kar huun tera to ai ḳhuda ik din
ye muzhda aa ke mire ru-ba-ru zabani de
vo mere ḳhvabon ko ankhon se chhin leta hai
use na shahr-e-tamanna ki hukmarani de
samundaron pe baras kar na ho fana badal
jo log pyase hain un ke labon ko paani de
hai tang meri nazar men ye ka.enat teri
mire ḳhuda mujhe idrak-e-la-makani de
main ḳhali haath milun tujh se kis tarah yarab
kitab siine pe mere bhi asmani de
Leave a Reply