Ruke Hue Hain Jo Dariya Unhen Rawani De

ruke hue haiñ jo dariyā unheñ ravānī de

tū apne hone kī mujh ko koī nishānī de

palaT ke dekh luuñ tujh ko to sañg ho jā.ūñ

mire yaqīn ko aisī koī kahānī de

maiñ shāh-kār huuñ terā to ai ḳhudā ik din

ye muzhda aa ke mire rū-ba-rū zabānī de

vo mere ḳhvāboñ ko āñkhoñ se chhīn letā hai

use na shahr-e-tamannā kī hukmarānī de

samundaroñ pe baras kar na ho fanā bādal

jo log pyāse haiñ un ke laboñ ko paanī de

hai tañg merī nazar meñ ye kā.enāt terī

mire ḳhudā mujhe idrāk-e-lā-makānī de

maiñ ḳhālī haath milūñ tujh se kis tarah yārab

kitāb siine pe mere bhī āsmānī de

Leave a Comment