kya kahun tujh se miri jaan main shab ka ahval
tujh pe raushan hai dil-e-vasl-talab ka ahval
huun main ik ashiq-e-be-bak o kharabati o rind
mujh se mat puchh mire ilm-o-adab ka ahval
dil ko khali karun ro ro ke magar main be-kas
kaun sunta hai mire ranj-o-taab ka ahval
mahram-e-raz nahin milta koi dard hai ye
kya tabibon se kahun ishq ke tab ka ahval
lutf hai sab se sazavar-e-ghazab ek huun main
khuub dekha jo tire lutf o ghazab ka ahval
ai miyan aaj to do baat miri bhi sun le
kaha chahun huun main tujh se bhala kab ka ahval
zor hai jaise ki nisbat namak o riish ke biich
main hi samjhun tiri kaifiyyat-e-lab ka ahval
nahin dam marne ki mujh ko tire aage majal
haae sunta hai tu kis tarah se sab ka ahval
kya koi khush ho mire sher ko sun ke ‘hasrat’
dard-e-dil hai ye nahin aish-o-tarab ka ahval
Leave a Reply