jazba-e-dil ne mire tasir dikhlai to hai
ghungruon ki janib-e-dar kuchh sada aai to hai
ishq ke izhar men har-chand rusvai to hai
par karun kya ab tabiat aap par aai to hai
aap ke sar ki qasam mere siva koi nahin
be-takalluf aaiye kamre men tanhai to hai
jab kaha main ne tadapta hai bahut ab dil mira
hans ke farmaya tadapta hoga saudai to hai
dekhiye hoti hai kab raahi su-e-mulk-e-adam
khana-e-tan se hamari ruuh ghabrai to hai
dil dhadakta hai mira luun bosa-e-rukh ya na luun
niind men us ne dulai munh se sarkai to hai
dekhiye lab tak nahin aati gul-e-ariz ki yaad
sair-e-gulshan se tabiat ham ne bahlai to hai
main bala men kyuun phansun divana ban kar us ke saath
dil ko vahshat ho to ho kambakht saudai to hai
khaak men dil ko milaya jalva-e-raftar se
kyuun na ho ai naujavan ik shan-e-raanai to hai
yuun muravvat se tumhare samne chup ho rahen
kal ke jalson ki magar ham ne khabar paai to hai
bada-e-gul-rang ka saghar inayat kar mujhe
saqiya takhir kya hai ab ghata chhai to hai
jis ki ulfat par bada daava tha kal ‘akbar’ tumhen
aaj ham ja kar use dekh aae harjai to hai
Leave a Reply