agarche zehn ke kashkol se chhalak rahe the
ḳhayal sher men Dhalte hue jhijak rahe the
koi javab na suraj men tha na chand ke paas
mire saval sar-e-asman chamak rahe the
na jaane kis ke qadam chumne ki hasrat men
tamam raste dil ki tarah dhaḌak rahe the
kisi se zehn jo milta to guftugu karte
hujum-e-shahr men tanha the ham, bhaTak rahe the
ye us ne dekha tha ik raqs-e-na-tamam ke ba.ad
vufur-e-shauq men kaun-o-makan thirak rahe the
kitab-e-umr-e-guzishta ke hashiyon men ‘nabil’
vo shor tha ki zamin asman dhamak rahe the
Leave a Reply