lab bayaban, bose be-jan
kaun si uljhan ko suljhate hain ham?
jism ki ye kar-gahen
jin ka haizam aap ban jaate hain ham!
nim-shab aur shahr-e-khvab-aluda, ham-sae
ki jaise duzd-e-shab-gardan koii!
shaam se the hasraton ke banda-e-be-dam ham
pi rahe the jaam par har jaam ham
ye samajh kar jura-e-pinhan koi
shayad akhir ibtida-e-raz ka iima bane!
matlab asan harf be-maani
tabassum ke hisabi zaviye
matn ke sab hashiye
jin se aish-kham ke naqsh-e-riya bante rahe!
aur akhir buad jismon men sar-e-mu bhi na tha
jab dilon ke darmiyan haail the sangin fasle
qurb-e-chashm-o-gosh se ham kaun si uljhan ko suljhate rahe!
kaun si uljhan ko suljhate hain ham?
shaam ko jab apni gham-gahon se duzdana nikal aate hain ham?
ya zaval-e-umr ka dev-e-subuk-pa ru-ba-ru
ya ana ke dast o pa ko vusaton ki aarzu
kaun si uljhan ko suljhate hain ham?
Which Mystery do We Unravel ?