Nasir Kazmi
jabin pe dhuup si ankhon men kuchh haya si hai
tu ajnabi hai magar shakl ashna si hai
khayal hi nahin aata kisi musibat ka
tire khayal men har baat gham-ruba si hai
jahan men yuun to kise chain hai magar pyare
ye tere phuul se chehre pe kyuun udasi hai
dil-e-gamin se bhi jalte hain shadman-e-hayat
usi charagh ki ab shahr men hava si hai
hamin se aankh churata hai us ka har zarra
magar ye khaak hamare hi khuun ki pyasi hai
udaas phirta huun main jis ki dhun men barson se
yunhi si hai vo khushi baat vo zara si hai
chahakte bolte shahron ko kya hua ‘nasir’
ki din ko bhi mire ghar men vahi udasi hai
Leave a Reply