maryam-naz

Hasil-E-Fan Hai Bas Kalam Ki Dad

hasil-e-fan hai bas kalam ki daad

varna milti hai sab ko naam ki daad

kis qadar be-rukhi se milta hai

dushman-e-jan tire salam ki daad

jurm ghurbat pe ja ke lagta hai

vaise banti hai is nizam ki daad

khubsurat hai kaenat bahut

khaliq-e-husn-e-intizam ki daad

ishq milta hai hijr ke hi evaz

ai dukan-dar tere daam ki daad

mai-kade se nikalte milti hai

hosh valon ko mere jaam ki daad

aap ne naqs to nikala nahin

aap ki daad kab hai kaam ki daad

sahti rahti huun vahshaten ‘mariyam’

subh milti hai mujh ko shaam ki daad

More Poems

Leave a Comment