Aslam Ansari
har shaḳhs is hujum men tanha dikha.i de
duniya bhi ik ajiib tamasha dikha.i de
ik umr qat-e-vadi-e-shab men guzar ga.i
ab to kahin sahar ka ujala dikha.i de
ai mauja-e-sarab-e-tamanna sitam na kar
sahra hi samne hai to sahra dikha.i de
main bhi chala to pyaas bujhane ko tha magar
sahil ko dekhta huun ki pyasa dikha.i de
alfaz ḳhatm hon to mile rishta-e-ḳhayal
ye gard baiTh jaa.e to rasta dikha.i de
kaun apna aks dekh ke hairan palaT gaya
chehra ye mauj mauj men kis ka dikha.i de
tu munkir-e-vafa hai tujhe kya dikha.un dil
gham sho.ala-e-nihan hai bhala kya dikha.i de
har shab dar-e-ḳhayal pe Thahre vo ek chaap
har shab fasil-e-dil pe vo chehra dikha.i de
lab-bastagi se aur khile ghuncha-e-sada
vo chup rahe to aur bhi goya dikha.i de
‘aslam’ gharib-e-shahr-e-suḳhan hai kabhi milen
kahte hain aadmi to bhala sa dikha.i de
Leave a Reply