mujh ko duniya ke har ik gham se chhuḌa rakkha hai
jalva-e-yar ne mad.hosh bana rakkha hai
maut se aap ki ulfat ne bacha rakkha hai
varna bimar-e-gham-e-hijr men kya rakkha hai
arsa-e-hashr men rusva.i yaqini thi magar
teri rahmat ne har ik jurm chhupa rakkha hai
manzil-e-dair-o-haram chhoḌ ke ai jan-e-jahan
main ne ka.aba teri chaukhaT ko bana rakkha hai
jazba-e-ishq men takmil-e-ibadat ke liye
main ne sar yaar ke qadmon men jhuka rakkha hai
tere jalvon ki ye shoḳhi are tauba tauba
hosh muusa ka sar-e-tur uTha rakkha hai
Leave a Reply