Sirajuddin Zafar
koi ranj hai na shikayaten mujhe apne hosh-e-parida se
ye vo sham.a thi jo bhaḌak uThi miri ah-e-nim-kashida se
miri vahshaton ki hai intiha ki kisi ka husn hai runuma
kabhi mere daman-e-chak se kabhi meri jeb-e-darida se
main numud-e-husn-e-alast huun main charagh-e-ishq-ba-dast huun
ye tajalliyat-e-bahar hain mire rang-o-bu-e-parida se
tiri yaad meri aniis hai tiri yaad meri jalis hai
miri zindagi ki numud hai tiri arzu-e-tapida se
main haram men mahv-e-niyaz tha main buton men sajda-taraz tha
kabhi imtiyaz na ho saka mire zauq-e-hijr-chashida se
koi arzu-e-dili ‘siraj’ murad ko na pahunch saki
koi phuul baar na pa saka miri kisht-e-barq-rasida se
Leave a Reply