Kyon Kahe Koi Ki Tumne Kya Kiya

kyoñ kahe koī ki tum ne kyā kiyā

kyoñ nahīñ kahte ki haañ achchhā kiyā

kyoñ na ḳhvāhish ke mutābiq de murād

jis ne be-ḳhvāhish hameñ paidā kiyā

dost aur ye zid ki jo us se kahā

kah ke logoñ meñ mujhe rusvā kiyā

maiñ ne jal kar baat karnī chhoḌ dī

us ne chup rahne kā bhī charchā kiyā

laḌ to aayā us se lekin ham-nashīñ

dil meñ kahtā huuñ ki ‘nāzim’ kyā kiyā

Leave a Comment