zalzala aaya vo dil men vaqt ki raftar se
ḳhud-baḳhud tasvir teri gir paḌi divar se
chupke chupke khinchta jaata huun kanTon ka hisar
main ki ab Darne laga huun phuul ki mahkar se
ham bala-noshon ne zahr-e-agahi bhi pi liya
chalte chalte ham bhi Thokar kha ga.e kohsar se
jin ko ankhon se lagaya jin ko ro ro kar paḌha
haa.e vo ḳhat bhi nazar aane lage bekar se
dida-e-yaqub har chehre men hai girya-kunan
ham bahut ukta ga.e hain misr ke bazar se
ham se shikva kar raha tha aaj daman-e-tahi
toḌ laa.e mah-o-anjum fikr ke gulzar se
‘nur’ sahab khul na jaa.e tark-e-ulfat ka bharam
aap ki ḳhamoshiyon se aap ke ash.ar se
Leave a Reply