har ik achchhe-bure se vasta hai
mujhe ye shahr saara janta hai
vo badal huun jo barsega yaqinan
mire rone men sab ka fa.eda hai
ye sach hai tu rag-e-jan se hai nazdik
magar jiina to mera mas.ala hai
shab-e-furqat koi aa.e na aa.e
sahar hone ka ḳhadsha dusra hai
mujhe ab ehtiyatan ḳhat na likhna
mire beTe ko paḌhna aa gaya hai
tumhen ehsas ho ja.ega ‘nusrat’
yahan har aadmi tum se baḌa hai
Leave a Reply