ye gardish-e-halat ye afkar-e-zindagi
kaT jaa.e jaise bhi ho shab-tar-e-zindagi
rakhta hai us ko kitne masa.il men gher kar
azad ho na jaa.e giraftar-e-zindagi
ab aur kya nisar karen tujh pe ai hayat
sab kuchh luTa chuke sar-e-bazar-e-zindagi
main kya kahun ki sharm si aati hai doston
jab dekhta huun pasti-e-kirdar-e-zindagi
kya dekhte hi dekhte sab kuchh badal ga.e
raftar-e-zindagi na vo guftar-e-zindagi
kya ḳhaak kam hon ‘taj’ ye alam-e-rozgar
hai zindagi ke saath ye azar-e-zindagi
Leave a Reply