Ashfaq Husain
vo dost hai aur bura nahin hai
bas mere mizaj ka nahin hai
dil mera bhi kab tha aisa saada
vo aankh bhi be-ḳhata nahin hai
us shaḳhs ne pher li hon ankhen
aisa to kabhi hua nahin hai
ik baar mohabbaton ka badal
barsa hai to phir ruka nahin hai
ye jaan se guzarti sa.aten hain
ye dard ka marhala nahin hai
kuchh zaḳhm vahan lage hain lekin
vo shahr to bevafa nahin hai
jo meri talash men hai ab tak
main huun koi dusra nahin hai
is ahd ki hai ye ik zarurat
hijrat koi saneha nahin hai
Leave a Reply