daru-e-dard-e-nihan rahat-e-jani sanama
iisa murda-dilan yusuf-e-sani sanama
tere sadqe miri jaan tujh pe mira dil qurban
varis-e-kaun-o-makan fakhr-e-zamani sanama
tera har jalva hai aina-e-asrar-e-azal
teri surat men hain anvar-e-maani sanama
dil ke daghon ko kaleje se laga rakkha hai
ki yahi daagh to hain teri nishani sanama
tu hi jab qissa-e-gham se mire ghabrata hai
phir sune kaun mire gham ki kahani sanama
ta-kuja ashk bujhaenge mire dil ki lagi
phunke deta hai mujhe soz-e-nihani sanama
vaqf sajda hai tire dar pe jabin-e-‘bedam’
qibla-e-dil sanama kaaba-e-jani sanama
Leave a Reply