gaaḌi ki khiḌki se dekha shab ko us ka shahr
charon or tha kaala jangal biich men ujla shahr
yaad na aata kyuun gaanv men ham ko bhi lahore
log samundar-par na paa.en is se achchha shahar
sach hai har ik mulk ḳhuda ka des hai har insan ka
lekin apna shahr hai yaaro aḳhir apna shahr
ḳhvab men sun kar jaag uThta huun un ki chiḳh-pukar
uf vo laḌte marte baasi uf vo jalta shahr
poshida hain dil men us ki yadon ke tufan
dafn hain ek khanDar ki tah men kitne zinda shahr
mujh par ik ghanghor udasi tujh par rang aur nuur
mera chehra ban hai pyaar se tera chehra shahr
kal ki baat hai aur thakan se ab tak chuur huun main
us laḌki ka jism tha ‘zahid’ uncha-nicha shahr
Leave a Reply