Moin Ahsan Jazbi
intiha-e-gham men mujh ko muskurana aa gaya
haa.e ifaqa-e-mohabbat ka bahana aa gaya
is taraf ik ashiyane ki haqiqat khul ga.i
us taraf ik shoḳh ko bijli girana aa gaya
ro diye vo ḳhud bhi mere girya-e-paiham pe aaj
ab haqiqat men mujhe aansu bahana aa gaya
meri ḳhak-e-dil bhi aḳhir un ke kaam aa hi ga.i
kuchh nahin to un ko daman hi bachana aa gaya
vo ḳharash-e-dil jo ai jazba-e-jazbi miri hamraz thi
aaj use bhi zaḳhm ban kar muskurana aa gaya
Leave a Reply