saton falak kiye tah-o-bala nikal gaya
aḳhir shab-e-firaq men naala nikal gaya
vahshat ne mujh pe arsa-e-hasti kiya jo tang
ghabra ke su-e-alam-e-bala nikal gaya
sar de de yad-e-gesu-e-janan ki chaah men
piiTa karo lakir ko kaala nikal gaya
yaqub-var rota main us but ke hijr men
yusuf mira ḳhuda-e-ta.ala nikal gaya
furqat men us ki shiddat-e-girya kahan talak
barsa baras ke abr ka jhala nikal gaya
roka kiye mala.eka haft asman ke
saton falak ko toḌ ke naala nikal gaya
so.e na sakinan-e-mohalla sahar talak
be-saḳhta jo raat ko naala nikal gaya
kyun-kar na roiye dil-e-gum-gashta ke liye
naz-o-ni.am se tha jise paala nikal gaya
pir-e-mughan faqir ko samjhe sharab-ḳhor
jis mai-kade men le ke piyala nikal gaya
jaata na ghar se aap ke zid se raqib ki
lekin ba-pas-e-ḳhatir-e-vala nikal gaya
jhaTka jo uljhi zulf ko jhunjhla ke yaar ne
haale se machhli kaan se baala nikal gaya
kis rashk-e-gul ki dekhi qaba us ne tang chust
bahar jo apne jaame se laala nikal gaya
daana tha kya haram ka rizq-e-halal men
munh se jo ai karim nivala nikal gaya
buuTa kaho na qamat-e-dilbar ko sha.ero
ab sarv se bhi vo qad-e-bala nikal gaya
raunda kiya main ḳhar-e-bayaban ko ai junun
har ik bacha ke paanv ka chhala nikal gaya
kambal men apne garm raha main faqir-e-mast
kiya gaya na dur-dar duuna nikal gaya
phir chal dila na kucha-e-gesu ka qasd kar
hai aaj raah kaaT ke kaala nikal gaya
ukta gaya ba-tang hua kya kare gharib
aḳhir tumhara chahne vaala nikal gaya
mehman hai faqir hai sun lenge aap ‘rind’
murshid ka apne kar ke pyala nikal gaya
Leave a Reply