Najeeb Ahmad
ham apne ghar se ba-rang-e-hava nikalte hain
kisi ke haq men kisi ke ḳhilaf chalte hain
abhi to din hai abhi taḳht-e-asman pe chamak
tulu-e-sham ke saath aftab Dhalte hain
chale bhi ham to mah-o-sal ki misal chale
faqir log inhi silsilon men palte hain
uḌe bhi ham to usi samt ruḳh raha apna
jidhar uḌen to farishton ke par bhi jalte hain
hamare aks tire shahr men rahe abad
ki us jagah to faqat aa.ine badalte hain
zamin pe paanv zara ehtiyat se dharna
ukhaḌ ga.e to qadam phir kahan sambhalte hain
‘najib’ jin ko gharaz ho na kuchh zamane se
unhi ke saath abad tak zamane chalte hain
Leave a Reply