aaj sayyad ne bhule se chaman dikhlaya
meri taqdir ne phir mujh ko vatan dikhlaya
ain masti men jo vo shoḳh hua sar ki jabin
ye uḌe hosh ki nashshe ne hiran dikhlaya
jhuT-puTa vaqt hua maut ka saman shab-e-vasl
sahar-e-hijr ka murdon ne kafan dikhlaya
chand ko dekhte hain loTte angaron par
tum ne kyuun kabk-e-dari ko ye chalan dikhlaya
aa.e vallah dil-e-hairan men kya kuchh arman
us ne a.ine ko tan tan ke jo tan dikhlaya
marte jiite hi rahe ham to aji dam dam men
na kamar us ne dikha.i na dahan dikhlaya
yaad men phuul se galon ke sambhala dil ko
kabhi nasrin to kabhi us ko saman dikhlaya
phir tira shor-e-tabassum jo namak-rez hua
phir mira taaza mujhe zaḳhm-e-kuhan dikhlaya
kal jo tha va.ada-e-vasl aaj vo farda nikla
din qayamat ka to ai va.ada-shikan dikhlaya
kyuun na main ḳhaar banun chashm-e-raqiban men ‘nasim’
phuul se gaal mujhe ghuncha-dahan dikhlaya
Leave a Reply