Hurmat-E-Ishq Tujhe Dagh Lagane Ka Nahin

Yunus Tahseen

hurmat-e-ishq tujhe daagh lagane ka nahin

baat banti na bane baat se jaane ka nahin

ya-ḳhuda ḳhair ki ham donon ana vaale hain

vo bulane ka nahin aur main jaane ka nahin

vahshati huun so gareban ko aa sakta huun

mujh se Darne ka magar mujh ko Darane ka nahin

buḌhe a.asab kahan sahte hain aulad ka dukh

meri taklif miri maan ko batane ka nahin

ham to ik aisi zamin par hain jahan lashen hain

tum ne jo naqsha diya tha vo ḳhazane ka nahin

main azal ta-ba-abad aur abad ta-da.im

is ka matlab main kisi ek zamane ka nahin

dars ye ḳhaas hamen al-e-payambar se mila

sar kaTane ka magar sar ko jhukane ka nahin

main abu-bakr-o-ali vaala huun ‘yunus-tahsin’

mujh ko mulla ke masalik se milane ka nahin