ye dil hai vo makan jo la-makan vaale ki manzil hai
vo laila hai isi men ye usi laila ka mahmil hai
na khush aata hai sahra aur na dil basti men lagta hai
ye kaisi kashmakash men jaan hai aur kaisi mushkil hai
yahi dekha tamasha ja ke ham ne bazm-e-janan men
kahin lasha tadapta hai kisi ja raqs-e-bismil hai
jise dekha use ghayal kiya hai chashm-e-janan ne
bachegi jaan kyunkar aankh bhi qatil ki qatil hai
hamesha ham-baghal vo rashk-e-laila hai tasavvur men
meri aghosh goya ai junun aghosh-e-mahmil hai
kiya be-ghat hai ‘aughat’ janab-e-shah-‘varis’ne ne
samajh men khud nahin aati hai aisi apni manzil hai
Leave a Reply