ajiib log hain gul karke zindagi ke charagh
jala.e baiThe hain apne gharon men ghi ke charagh
bhaTak rahe hain andheron men mehr-o-mah-o-nujum
har ek samt farozan hain tirgi ke charagh
nazar nazar men diye hasraton ke larzan hain
qadam qadam pe hain raqsan fasurdagi ke charagh
chaman men zagh-o-zaghan ki bapa vo shorish hai
ki chhin ga.e hain anadil se naghmagi ke charagh
bhaḌak uThi hai dilon men vo atish-e-nafrat
ki jal uThe hain labon tak pe tishnagi ke charagh
ye soch len ki uḌaa.e hansi na bad-e-ḳhizan
karen na ahl-e-chaman gul shaguftagi ke charagh
unhin ke ghar men andhera hai ḳhuun se jin ke
farogh-kash hain shabistan-e-ḳhvajgi ke charagh
muhit ḳhana-e-jan par hai abr-e-mahrumi
jalao ḳhun-e-tamanna se zindagi ke charagh
uThi hain andhiyan iblisiyat ki vo ‘at.har’
laraz rahe hain ḳhuda.i men bandagi ke charagh
Leave a Reply