Afzal Naved
apne hi tale aai zaminon se nikal kar
aa jaata huun shakhon pe dafinon se nikal kar
darvaze the kuchh aur bhi darvaze ke pichhe
barson pe gai baat mahinon se nikal kar
so jaati hai basti to makan pichhli gali men
tanha khada rahta hai makinon se nikal kar
kis sub.h-e-tamasha ka bachaya hua sajda
rukh par chala aata hai jabinon se nikal kar
aisi koi asan hai divangi yaaro
aai bhi to aaegi qarinon se nikal kar
vo aur koi abr hai jo khulta nahin hai
sar par jo khada rahta hai sinon se nikal kar
muddat se mire raste men aaya hua hai
patthar sa koi tere naginon se nikal kar
ik roz jo divar thi vo ham ne gira di
paani men chale aae safinon se nikal kar
ye dekh mira nakhl-e-kutub-ha-e-darakhshan
jo phail gaya khuun pasinon se nikal kar
aa jaate hain sahil pe dikhane hamen munh log
tariki men duube hue zinon se nikal kar
ik den hai ham jaison ki ashufta-sari ko
tham rahta hai afaq pe dinon se nikal kar
zerin kahin rahti hai tapasya se bhari lahr
budh aur hai andoh-nashinon se nikal kar
mismar ajaib jo hua jang-o-jadal se
mitti ke zaruf aa gae minon se nikal kar
hamrah asason ki kahan dhund sakenge
aaya na agar saanp khazinon se nikal kar
atraf-e-dar-o-bam hi le baithenge mujh ko
gar qasd-e-chaharum na ho tinon se nikal kar
phir samna hoga mira apni hi mashin se
aaya bhi jo bil-farz mashinon se nikal kar
duniya ko piroega ‘naved’ ek ladi men
aaega koi khak-nashinon se nikal kar
Leave a Reply