Ravish Siddiqi
kaun kahta mujhe sha.ista-e-tahzib-e-junun
main tiri zulf-e-pareshan ko agar chheḌ na duun
kaun hasrat-zada-e-shauq-e-takallum hai yahan
laḌkhaḌata hai tiri chashm-e-suḳhan-go ka fusun
ye hujum-e-gham-e-dauran men kahan yaad raha
dastan-e-gham-e-dil tere taghaful se kahun
kya ḳhabar ḳhema-e-laila ke nigahbanon ko
ki harim-e-dil-e-laila men hai mehman-e-junun
rang rah rah ke tire ruḳh ka uḌa jaata hai
varna main aur tiri mahfil-e-tamkin se uThun
qaid-e-hasti men ye ik gosha-e-daman-e-ḳhayal
phir ghanimat hai ki zindan men bhi azad to huun
ho saliqe se bahakna to maza deta hai
mire saaqi ko guman hai ki bahut hosh men huun
justuju ki koi manzil jo nahin hai to na ho
himmat-e-ishq ye kahti hai ki baḌhta hi rahun
ab tire haal pe tujh ko dil-e-nadan chhoḌa
sochna bhi to qayamat hai kahan tak sochun
main ne pahchan liya us ko sar-e-bazm ‘ravish’
us ki ankhon ko hai israr ki ḳhamosh rahun
Leave a Reply