Kabhi Tegh-E-Tez Supurd Ki Kabhi Tohfa-E-Gul-E-Tar Diya

Sarvat Husain

kabhi tegh-e-tez supurd ki kabhi tohfa-e-gul-e-tar diya

kisi shah-zadi ke ishq ne mira dil sitaron se bhar diya

ye jo raushni hai kalam men ki baras rahi hai tamam men

mujhe sabr ne ye samar diya mujhe zabt ne ye hunar diya

zamin chhoḌ kar nahin ja.unga naya shahr ek basa.unga!

mire baḳht ne mire ahd ne mujhe iḳhtiyar agar diya

kisi zaḳhm-e-taza ki chaah men kahin bhuul baiThun na raah men

kisi naujavan ki nigah ne jo payam vaqt-e-sahar diya

mire saath bud-o-nabud men jo dhaḌak raha hai vajud men

isi dil ne ek jahan ka mujhe ru-shanas to kar diya