yaqin ki dhuup men saaya bhi kuchh guman ka hai
yahi to vaqt musafir ke imtihan ka hai
palaT raha hai zamana sada-e-haq ki taraf
jahan-e-fikr men charcha miri azaan ka hai
usi ke ḳhauf se larzan hai dushmanon ka hujum
vo ek tiir jo TuuTi hui kaman ka hai
yahi kahin pe vafaon ki qabr-gah bhi thi
yahi kahin se to rasta tire makan ka hai
ik ek harf ki rakhni hai aabru mujh ko
saval dil ka nahin hai miri zaban ka hai
jo ek chhoTa sa dil hai ‘salim’ siine men
vo aftab mohabbat ke asman ka hai
Leave a Reply