tasavvur aap ka hai aur main huun
yahi ab mashghala hai aur main huun
miri zid se mila phir dushmanon se
bas ab vo bevafa hai aur main huun
vo ho aur main huun aur koi na ho ghair
yahi har-dam dua hai aur main huun
tasavvur men hain pahron un se baten
shikayat ka maza hai aur main huun
tumhari khu hai ranjish har ghadi ki
ye jhagda roz ka hai aur main huun
ilahi vasl hai ya khvab hai ye
husul-e-muddaa hai aur main huun
hazaron gham to dekhe us se mil kar
vahi phir hausla hai aur main huun
sahe kya kya sitam aur ab talak bhi
tamanna hai vafa hai aur main huun
gae vo to jahan jaana tha un ko
ab un ka naqsh-e-pa hai aur main huun
har ik se hal-e-dil kahta huun apna
ye charcha ja-ba-ja hai aur main huun
do aalam ki khushi se kuchh nahin kaam
faqat ik gham tira hai aur main huun
vo hai aur ahd-name hain adu se
nasibon ka likha hai aur main huun
gham-e-duri qayamat hai ki har-dam
ajal ka samna hai aur main huun
khuda ki jannaten hain aur hai khalq
sanam kucha tira hai aur main huun
sahar hote hi jaate hi kisi ke
vahi ah-o-buka hai aur main huun
‘nizam’ us but ke gham men ho tasalli
bas ik zat-e-khuda hai aur main huun
Leave a Reply