dayar-e-shab ka muqaddar zarur chamkega
yahin kahin se charaghon ka nuur chamkega
kahan huun main koi muusa ki ik sada pe miri
vo nuur phir se sar-e-koh-e-tur chamkega
tire jamal ka nashsha sharab jaisa hai
hamari ankhon se us ka surur chamkega
bharam jo pyaas ka rakkhega aḳhiri dam tak
usi ke haath men jam-e-tuhur chamkega
ye kah ke daar pe ḳhud ko chaḌha diya main ne
ki daar par bhi sar-e-be-qusur chamkega
luTe hue hain magar ham abhi nahin mayus
hamare taaj men phir koh-e-nur chamkega
talash karta hai mujh musht-e-ḳhak men tu abas
ghurur hoga jabhi to ghurur chamkega
mata-e-fan se navaza gaya hai tujh ko ‘faragh’
isi se naam tira duur duur chamkega
Leave a Reply