vo mohabbat na sahi dard-e-mohabbat hi sahi
kuchh to mil jaa.e hamen aap ki nafrat hi sahi
dast-e-qudrat ka banaya hua shahkar to hai
aadmi aaj ka ik harf-e-malamat hi sahi
un ki qismat men samundar ka sukun likkha hai
apni taqdir men sahraon ki vahshat hi sahi
shahr men tere thake paanv musafir ke liye
do ghaḌi baiTh ke dam lene ki fursat hi sahi
aankh jalte hue lamhon se milana hoga
dil men biiti hui sadiyon ki halavat hi sahi
Leave a Reply