vo mohabbat na sahī dard-e-mohabbat hī sahī
kuchh to mil jaa.e hameñ aap kī nafrat hī sahī
dast-e-qudrat kā banāyā huā shahkār to hai
aadmī aaj kā ik harf-e-malāmat hī sahī
un kī qismat meñ samundar kā sukūñ likkhā hai
apnī taqdīr meñ sahrāoñ kī vahshat hī sahī
shahr meñ tere thake paañv musāfir ke liye
do ghaḌī baiTh ke dam lene kī fursat hī sahī
aañkh jalte hue lamhoñ se milānā hogā
dil meñ biitī huī sadiyoñ kī halāvat hī sahī