Naina Adil
ḳhushbu se teri haath milane ka shauq hai
phir us ko do-jahan se chhupane ka shauq hai
ankhen hon ḳhvab hon ki shikasta imaraten
har ik khanDar men diip jalane ka shauq hai
kuchh der apne saath bhi rahne do ab hamen
is raushni ko a.ina-ḳhane ka shauq hai
iz.har-e-as shauq-e-tamasha fasurdagi
kyon dil ko itna baar uThane ka shauq hai
hijrat azal se hai mire ajdad ka shi.ar
mujh ko bhi ek naav banane ka shauq hai
kyon ham ye baat baat pe dene lage javab
in ko to ḳhair baat baḌhane ka shauq hai
ik nuur hi to saare taḳhayyul ki jaan hai
aur is pe ham ko rang jamane ka shauq hai
har ek ko sanam ho ḳhuda ho ki aadmi
mathe pe mere daagh lagane ka shauq hai
barbad hote ja.enge jitna karoge tum
ham ko tumhara haath banane ka shauq hai
‘naina’ unhi ki samt safar kar rahi huun main
raste men jin ko dhuup bichhane ka shauq hai
Leave a Reply